قالت زوجة الشهيد اللواء ياسر عصر، شهيد المترو: «كان المفروض أنه بيجي أجازة يوم الخميس والجمعة وبيمشي السبت الصبح ويرجع يوم الأحد، بس هو عمره ما كان بيتأخر على إنه يأدي واجبه لآخر وقت».
وأضافت زوجة شهيد المترو، خلال لقائها بفضائية «TeN»، اليوم الثلاثاء: «المفروض إنه كان جاي امبارح الإثنين وكلمته قبل الحادثة بوقت بسيط، قولتله انت جاي، فقالي إن شاء الله، مش عارف، الله أعلم، جاي ولا مش جاي، تقريبا كان حاسس، وبعد شوية حسيت إنه فيه حاجة فرجعت اتصلت بيه لاقيت تليفونه مقفول فقولت أكيد فيه مشكلة وهو مش فاضي يرد عليا، وبعد كده التليفون اتفتح، وفضلت اتصل بيه مش بيرد، وبعد كده لاقيت ابني نازل وبيقولي إن باباه تعبان وفي المستشفى، فاتصلت بأخو زوجي فلاقيته هناك في المستشفى معاه، وهما ناس متماسكين جدا ولما بيكون فيه حاجه مش بيخلوا الستات يروحوا في حتة».
وأردفت: «ولما وصلت المستشفى قالولي البقاء لله، وهو كان بيأدي واجبه لآخر وقت خاصة لما عرف بحريق محطة مسرة، ومنتظرش مجيء الحماية المدنية وقام بإطفاء الحريق بنفسه».
بينما قالت نجلة الشهيد ياسر عصر: «أنا كنت نايمة وصحيت لقيت مامتي بتكلم أخويا زياد، وبيقولها إن بابا تعبان، وبعد كده ماما كلمت حد من اعمامي عشان يكون مع بابا، وفعلا لقينا حد منهم هناك، أنا دايما فخورة بيه سواء كان شهيد أو لأ، لإنه مكنش بيحاول يرمي شغله على ناس تانية لحد النهاية».
