عايزينها فوضى

تعالوا نتكلم بالبلدى.. علشان هى مش خناقة فى حارة ولا كلمتين بيقولهم واحد خاين.. هى مش دعوات من المثقفين والمبدعين وعامة الشعب.. هى مش مجرد شائعات أو طق حنك حضرتك..  مش كدة خالص يا بيه.. دى أجهزة دول وتنظيمات إرهابية عايزينها فوضى.. عايزنها تقع وتنهار وتبقى خراب.. عايزينها تابعة ليهم، مش عاجبهم إنك تقف على رجليك، إنك تعمر الصحرا، وتبنى مدن جديدة، أو تفتح مشاريع.. مش عاجبهم عملية الاستقرار اللى عندنا.. عايزينها فوضى زى اللى حواليك.. مش عاجبهم، إنك تكون أقوى جيش فى المنطقة.. ولا تكون فاكر نسيو انت عملت فيهم إيه.. وبتحاربهم ازاى وقدمت كام شهيد علشان تبنى دولة.. نسيتوا كام واحد مات من إخواتنا على أرض سيناء.. فاكرين كام عسكرى رجع جثة لأهله،  طيب فاكرين أكتر من 300 مصرى اتقتلوا وهم بيصلو الجمعة فى مسجد الروضة فى سيناء، ومن الممكن جدا تبقى مكانهم وانت بتصلى..  اوعى تفكر إنهم مبسوطين بمعاملة ظباط الشرطة بعد الثورة.. أو تأمينهم لأهلى وأهلك فى نص الليل..أو أنك لما تدخل قسم الشرطة وتاخد حقك والظابط يقولك أوامر وينزل معاك علشان مشكلتك تتحل، أو لما بتوع المفرقعات ينزلو بلاغ اشتباه جسم غريب وتنفجر فيهم قنبلة يبقى عادى.. أو يمكن فاكر أن أى بلد فى العالم مش بيعانى من الغلا والأسعار، أو يمكن هناك بيلاقوا الفلوس فى الشوارع.. من الآخر الموضوع كبير، أكبر منى منك ومن شوية المشاكل اللى بيقابلونا كل يوم.. الموضوع أكبر من خناقة مع المدام على مصروف البيت.. يا سيدى ارجع بالذاكرة شوية لما جاتلهم الفرصة وحكموا البلد، فاكر إيه اللى حصل، فاكر كنا بنصرخ ازاى.. نسيت لما كان عيالنا بيتخطفوا، ولا مراتك تخاف تنزل من البيت بعد المغرب.. أو يمكن نسيت الكهرباء والمياه والسرقة بالإكراه والبلطجة والحرب الأهلية اللى كانت فى معظم المحافظات.. ولا نسيت مخطط تقسيم الدولة وفتح الأنفاق وتسلل الإرهابيين... طيب بص حواليك، شوف جيرانك من الدول.. علشان كده هما عايزينها فوضى.