أعلن الفنان والإذاعي خالد عليش، عبر صفحته على موقع التواصل الاجتماعي "فيسبوك"، عن سبب رحيله عن "نجوم Fm" في الخريطة البرامجية في 2019، وذلك بسبب صعوبة التوقيت وانشغاله بالتمثيل.
وقال "عليش": "لكل اللي بيسأل واللي مهتم واللي مش مهتم أنا ليه مش في نجوم إف إم السنة دي.. للأسف وببالغ الحزن والأسي مش هاكون ضمن فريق نجوم إف إم السنة دي يعني مفيش معاك في السكة ولا موقف ولا هلي في ٢٠١٩".
وأضاف: "أسباب كتير هي السبب في القرار ده منها الميعاد الصعب جدا وخصوصا إني بشتغل حاجات تانية منها إني بمثل وغيره.. بس اللي يعرفني كويس في الشغل يعرف إني بحب التجديد دايما ومبحبش أقف عند مرحلة معينة من النجاح وخلاص".
وتابع: "نجاحي في نجوم إف إم مكانش معتمد عليا أنا بس، بالعكس أنا كنت جزء صغير جدًا من منظومة اتشرفت إني اشتغلت معاهم من أصغر شخص لأكبر شخص ولآخر لحظة علاقتنا زي الفل يعني مش ماشي بمشكلة ولا حصلت خناقة، عشان الشائعات المغرضة، وكان من أهم أحلامي اللي عافرت كتير عشان أوصله إني اشتغل مذيع في نجوم إف إم".
واستطرد قائلا: "أنا سايبلكم خالد جواد مكاني عشان الوحيد اللي لقيته اسمه خالد.. ربنا معاه إن شاء الله ونجوم إف إم كلها في ضهره، أنا آسف لكل اللي اتعودو يروحو على البرنامج ولكل اللي مزاجه بيظبط مع الهلي بس هي سنة الحياة التغيير، مش عايز حد يزعل وعايزيكم تقفوا معايا في خطواتي اللي جاية وبلاش عبارات ليه يا معلم تعمل كده ده أنت كنت مكسر الدنيا ولا بصات الشفقة عشان أنا فيا اللي مكفيني".
واختتم قائلا: "انتظروا تفاصيل أكتر عن المشروع الإذاعي القادم في الأيام الجاية".
