لا بقى واضح كده متزعلش منى يا سى السيد انك مش فاهم اقتصاد العالم ماشى إزاى .
- ماتسيبى الموبايل اللى شاغلك ده يا أمينة وقومى شوحيلنا حتتين كبدة نتعشى بيهم؟!
- حتتين كبدة مرة واحدة.. هو انت مش داريان باللى حاصل فى العالم كله يا سى السيد؟!
- اللهم ماطولك يا روح.. منها لله ثورة يناير دى اللى خلتك تتكلمى فى السياسة يا أمينة بعد ما كنتى قطة مغمضة. فيه إيه بقى حاصل فى العالم ومش هيخلينا نتعشى؟!
- انت مادرتش يا سى السيد.. مش إيران رجعت قفلت مضيق هولمز تانى!
- هههههههههه الله يحظك يا أمينة اسمه مضيق هرمز يا ولية.
- أهو انت طول عمرك تمسك فى الشكليات يا سى السيد.. هولمز ولا هرمس هتفرق إيه.. المهم النتيجة يا خويا!
- وتطلع إيه النتيجة ده يا أمينة هانم؟!
- أحب على يدك ما تتمهزأش بيا يا سى السيد وكفاية المصايب اللى إحنا فيها.. هو انت متعرفش كل ما المضيق بيتقفل برميل الجاز بيوصل كام والأسعار كلها بتولع إزاي؟!
- طب وهو يعنى لما تفضلى ماسكة الموبايل ليل ونهار بالشكل ده برميل الجاز سعره هاينزل والأسعار هتبطل جنان؟!
- لا طبعا يا سى السيد أنا قاعدة منتظرة المضيق يتفتح تانى يمكن الأسعار ترجع زى زمان، وساعتها أشوفلك حكاية الكبدة دى.
- ليلتك مش فايتة يا أمينة.. هو انتى معلقة العشا على مضيق هرمز؟
- أيوه يا سى السيد، وإيه يعنى.. انت مش دايما تقولى إن العالم كله بقى قرية صغيرة وإن لو حد عطس فى الصين إحنا هنا نجيب منديل؟ طب مابالك بقى لو اللى عطس هرمز ذات نفسه؟!.
- الله يرحم أيام زمان لما كنتى بتستنينى على السلم باللمبة الجاز وتفضلى ترقينى واطلع ألاقى الأكل مستنى جاهز على الطبلية.. دلوقتى سيادتك قاعدة على الموبايل مستنية هرمز يفتح وانتى اللى قبل ثورة يناير كنتى فاكرة صندوق النقد جمعية خيرية بتوزع بطاطين.
- ما هو الواحد بيتعلم يا سى السيد. التجار دلوقتى بيشوفوا المضيق مقفول ولا مفتوح قبل ما يحطوا الأسعار ده أنا بقيت ديك النهار لما أدخل السوبر ماركت أبص للأسعار زى ما الناس بتبص على تنسيق الثانوية العامة!.
- طب كفاية فلسفة وقومى شوحى الكبدة اللى موجودة وخلاص.
- موجودة فين؟!
- مش قولتى فيه فى التلاجة يا ولية؟.
- سلامة عقلك يا سى السيد.. انت اللى قلت يا خويا مش أنا.. دى أمنية خيالية زى لما اقولك كده ودينى حفلة لعمرو دياب!
- يعنى مفيش كبدة أصلًا؟!
- ولا حتى صورة كبدة. قوم افتحلك كيس اندومى وسيبنى أشوف أخرتها إيه مع المضيق ده!
- الإندومى ده بتاع الناس التوتو يا أمينة.. عشنا وشوفنا سى السيد بطوله وعرضه يتعشى إندومي.. طب قومى شوفيلى بيضتين وحتة جبنة!
- مالك بقيت بتشطح بخيالك كده يا سى السيد.. جبنة مين يا راجل؟ دى الجبنة بقت تتباع كأنها مجوهرات. البقال قطعلى حتة صغيرة وحطها فى كيس أسود عشان محدش يحسدنى. طب إيش قولك الدهب نفسه بيطلع وينزل لكن الجبنة اتجاه واحد !
- طب حتى طبق فول وامرى لله!
- لا بقى واضح كده متزعلش منى يا سى السيد انك مش فاهم اقتصاد العالم ماشى إزاي.
- طب خليكى انتى فى الإقتصاد العالمى وأنا هاروح أتعشى عند زبيدة ولا جليلة!
- اتفضل يا خويا والقلب داعيلك!
والله عال يا أمينة يعنى حتى الغيرة بطلتيها؟!
- قال على رأى المثل يا سى السيد إيش ياخد الريح م البلاط.. يا راجل انت مش واخد بالك إنك بتلعب فى الوقت الضايع وبقالك سنتين تلاتة مستنى صفارة الحكم؟!
- طب علشان لسانك ده لمى هدومك وعلى أمك يا أمينة وابقى تعالى لما يفتحوا المضيق وهاتى معاكى بيض وجبنة وفول!.
- بس اعمل حسابك المرة دى لو مشيت مش راجعالك تانى.. قال على رأى المثل يا مستنى تتعشى بيض وجبنة وفول يا مستنى مضيق هرمز يبقى مفتوح على طول!
علي عبد الحفيظ يكتب: الأزهر الشريف ووأد الفتنة
تامر عادل يكتب: كأس العالم من عاصمة مصر الجديدة
فى الاحتفال بيوم إفريقيا التمسك بالتنمية المستدامة
