قالت بسنت حميدة العداءة الحاصلة على ذهبية سباق 100 متر دورة ألعاب البحر المتوسط: هذه البطولة أول مرة ألعبها من 4 سنوات، وحضرتها فى أسبانيا، وعملت مركز سادس وقعدت ساعة ونص ابكى وانا بتفرج على تكريمات اللاعبات الأجانب.
وتابعت: زوجى كان معايا طول الفترة الماضية وكان عندى إصابة منعتنى من السفر للأولمبياد وشافنى فى أصعب حالاتى وكان طول الوقت بيزعل على زعلى وهو سندنى وشاف لحظات ضعفى، وجمهور الجزائر كان بيشجع بطريقة رهيبة وهو شعب راقى ومحترم وكان معاهم أعلام مصر مع أعلام الجزائر وماكنتش لاقية كلام أشكر بيها زوجى.
وأضافت خلال مداخلة هاتفية ببرنامج الحكاية مع الإعلامى عمرو أديب: بالأمس ما كنتش مصدقة نفسى وكل اللى كنت بفكر فيه إنى أرفع علم مصر وأقول أن مصر موجودة، ومصر قوية وقعدت ابكى كثيرا جدا.
وأكملت: عندى 200 متر بكرة تصفيات والنهائى بعد بكرة، وبوعد مصر بميدالية أخرى إن شاء الله، العيلة كلها رياضية وأخواتى أبطال عالم وبابا بطل تايكوندو، وأنا الأولى على دفعتى فى الأكاديمية طوال الـ4 سنوات امتياز مع مرتبة الشرف وعاوزة أقول أن الرياضة عمرها ما كانت عائق أبدا.
