نشر المخرج مجدي أحمد علي «بوست » على صفحته على الفيسبوك حول ما يثار حاليا عن قضية أموال مبارك الرئيس الاسبق .
قال مجدي أحمد علي فيه : لو كنت ابن رئيس جمهورية في بلد فقير و أغلبية سكانه من الفقراء و أشباه المعدمين , و ظهر بأي شكل إن عندي 653 مليون دولار في الخارج , فالمطلوب مني لما أخاطب الشعب و العالم في بيان متلفز و مترجم , إني أولاً , أقول مصدر الفلوس دي ايه , فين الشغلانة اللي تكسب 653 مليون دولار خلال 20 سنة تقريبا (من بداية دخولهم سوق العمل حتى 2011 فقط؟!)
و أقول للشعب فين الشغلانة اللي مكسبها السنوي 32 مليون دولار , و بتدي صاحبها كل شهر 2.7 مليون دولار , هل مثلاً كنت شغال مدرب لريال مدريد من الباطن؟ , كنت بمثل في هوليود؟ , اخترعت علاج , طورت برنامج موبايل , كده يعني , و منها أبرأ ساحتي قدامهم , و بالمرة اعلمهم ازاي يتنغنغوا كده و يلعبوا بالفلوس لعب!
و ثانياً , أقول و أوضح أنا حاططهم في بنوك أجنبية ليه , و طلعتهم من البلد ليه و ازاي؟ , ايه السبب يعني؟ , خايف من الحسد مثلاً , بتهرب من الضرائب , بحوشهم للأولاد , أي سبب يعني لأن حضرتك هنا مش رجل أعمال و لا كسيب و لا شخص بيلقط رزقه من تجارة غير مشروعة , الاعتبار السياسي لمنصب والد حضرتك بيقول كده , و تصرفاتك الشخصية كإبن لرئيس الجمهورية بيترجمها العالم لأحكام على استقرار و اقتصاد البلد!!
ما أنا لو مستثمر و عندي توجه اني ادخل السوق المصري , و بعدين اشوف ابن رئيس الجمهورية ذات نفسه خايف و حاطط فلوس بالحجم ده خارج مصر , هترجم التصرف ده بشئ من اتنين , يا مصر دولة غير آمنة , يا فيها فساد ضخم و مالوش علاج , و مخلي ابن الرئيس نفسه خايف على فلوسه , فبأي منطق أحط فيها فلوس و اعمل استثمارات؟!!!
في أزمة رو-سيا و أوكرانيا الأخيرة الغرب خد وقت كبير جداً علشان يحجز على ممتلكات الرئيس الرو-سي فلاديمير بو-تين و أسرته , و مالقوش غير قصر في أسبانيا و بضعة عملات في بنك انجليزي فقط , و لذلك بدأنا نشوف قرارات كوميدية من نوعية الحجز على ممتلكات عشيقة بو-تين , أصدقاء بو-تين , اللي شافوا بو-تين و لا صلوش ع النبي , كده يعني!
و خلي بالكم , بكلمكم ع الفلوس المحجوز عليها في دولة واحدة فقط , مش بكلمكم مثلاً ع الفلوس و العقارات و المشروعات اللي شغال عليها في مصر أو في باقي دول العالم خارج الاتحاد الأوروبي ,
الخطاب له تكملة , و الكلام اللي اتقال وراه كلام , و الأخ جمال مبارك مش مواطن بيبرئ أسرته زي ما البعض بيقول , مش هنشتغل بعض , ده بدال ما يعتذر و يوضح الحقيقة طالع بيشكك في كل الاجراءات القضائية اللي تمت ضده , و اللي هي السبب الأساسي في رفع الحجز عن أرصدة أسرته في البنوك الغربية , يعني الراجل بيكرر الضرر اللي وقع علينا منه كمجتمع مرة تانية , يعني المستثمر اللي بيقرأ الأخبار دي مش هيقول مصر مفيهاش أمن و مليانة فساد بس , ده فيها قضاء مسيس و غير مستقل كمان!!
الخطاب توقيته مختار بعناية , و يبدو إنه نتاج فكر فريق عمل كبير داخل و خارج مصر , و بيفكرني بخطابات الباشاوات و الاخوان اللي غازلوا بيها الغرب أثناء حرب قناة السويس , و كل تفكيرهم إن الحرب دي هتطيح بحكم الرئيس جمال عبد الناصر , و هترجعهم بصحبة الشماشيرجية للقصر مرة تانية , لكن النتيجة اختلفت , و كل اللي قال كلمة لحسها!
السيد جمال مبارك النهاردة بيلعب نفس اللعبة , أزمة اقتصادية دولية خانقة بسبب تداعيات الحرب الرو-سية الاوكرانية , و صدام نرى آثاره بين الدولة المصرية و الولايات المتحدة و لا نرى أسبابه أو دوافعه , مع بعض السلوكيات الخاطئة و التوجهات الفكرية التي آراها عمقت من المشكلة الاقتصادية , و السيد جمال مبارك مطمئن و يتحدث بثقة لهذه الأسباب , إضافة لإنه مسيطر تماماً على البنية التحتية الاقتصادية المصرية عن طريق رجال لجنة السياسات , و اللي حذرنا كتير منهم و من استمرار سيطرتهم على السوق و القرار السياسي المصري ,
و علشان محدش يتفاجئ , هما دول اللي هيبشروا بالحليب و العسل و القمح و الشيكولاتة النوتيلا اللي هيجيبهم السيد جمال مبارك معاه في طريقه للعاصمة الإدارية!
و هنشوف مقالات و آراء عميقة عن قدرته على العودة بسعر الدولار لما دون النص جنيه , و ذكرياتهم عن كيفية استخراج القرش من بذر العنب في عصر السيد الوالد , و هنشوف تحويلات الدولار بالكوم من الولا-يات المتحدة طالما راضية و بترفع تنظيمات ملوثة بدماء المصريين من على قوائم الإر-هاب , شغل المعلم لابنه , ناس بتلعب بالبيضة و الحجر بجد , مش تقولي حقوق انسان و معونات و كلام فارغ!
و رغم كل الأسباب الوجيهة دي , لكن الواجب بيحتم عليا إني أحذر السيد جمال مبارك من مصير الباشاوات و الإخوان في عصر الرئيس جمال عبد الناصر , الحسابات السياسية عمرها ما كانت مضمونة , لعبة السياسة غدارة زي الكيميا , زيها زي لعب القمار بالضبط , و دي سكة خطر و أحسن منك كتير راحوا فيها , لو هتراهن راهن ع اللي منك , على شعبك و على دولتك و ناسك , كلمهم بلغتهم , و جاوب أسئلتهم , بس إجابات منطقية بعيد عن إجابات فريد الديب في المحكمة الله يكرمك , عديناها بمزاجنا احتراماً لتاريخ الرئيس مبارك العسكري فقط ,
يا كده يا بلاش , لأننا لن نقبل تمرير مخطط أمر-يكي جديد على حساب استقرارنا و أمننا و سلامتنا , كفاية المخطط اللي اتقنطر فيه السيد الوالد , و اللي يبدو إنك لم تتعلم منه أي شئ , و علشان واضح إنك ماتعلمتش منه أي حاجة , رأيي إنه بلاش , و افتكر إني قلت لك بلاش!
بالمناسبة دي أسئلة بريئة مش تشهير , أنا راجل مرتبي على قدي و كفاية عليا اللي خسرته من الرغي في السياسة , و معنديش فلوس و لا حيل اتجرجر في المحاكم , ده غير إني بطبيعتي بخاف ,
فجاوب ع السؤالين دول بكل صراحة , و ليك عليا قدام الناس دي كلها امسك ادمن صفحة جمال مبارك رئيساً لمصر لو جاوبت , أي خدمة .
مجدي أحمد علي
