قالت وفاء قطب مأذونة، إنها متزوجة منذ أكثر من سنة، موضحةً: "جهازي كان معتدل ومتوسط، ورغم كده، حتى الآن مستخدمتش حاجات".
وأضافت قطب، في مداخلة هاتفية مع الإعلامية بسمة وهبة مقدمة برنامج "90 دقيقة"، على قناة المحور، خلال حديثها عن موضوع الفقرة، وهي أشياء يمكن أن يتم الاستغناء عنها في تجهيزات الزواج: "لما بنشوف ظاهرة الغارمات في السجون، بنلاقي تجهيز البنات بشكل أوفر وملهوش لازمة".
وتابعت: "المشكلة إن البنات عاوزين يتجوزوا في بيت كامل زي بيت الوالد والوالدة، لكن الحقيقة إن البيوت دي تم تجهيزها في أكثر من 30 سنة، مثلا، ليه الإصرار على غرفة الأطفال في بيت الزواج، المفروض نجيب اللي على قدنا والغرفة تتقفل لو مفيش لها استخدام".
ونصحت، بتيسير الزواج على الشباب: "للأسف، في بعض المناطق الريفية، أهالي العريس بيعدوا حاجات العروسة، وبالتالي أهالي العروسة بيجيبوا حاجات كتير عشان ميتقالش إنهم جهزوا بنتهم بشكل قليل، خلونا نبص للأجانب وبيوتهم، شيك وحلوة وجميلة، رغم إن تكلفتها بسيطة، لكن إحنا بنستف الدواليب والمطبخ وتحت الأسرة".
إقرأ أيضاً .. حكايات| مأذونة «رايح- جاي».. رحلة «وفاء» بين قاعات أفراح الإسماعيلية
