أعرب الفنان محمد يسري نجل الفنان القدير «إبراهيم يسري» عن استيائه الشديد، بسبب ما وجّه إليه من نقد بعد أن أبدى رأيه في فيلم «أصحاب ولا أعز»، الذي أثار الجدل فور طرحه على منصة «نتفليكس» خلال اليومين الماضيين.
وقال الفنان محمد يسرى على صفحته الرسمية بموقع التواصل الاجتماعي «فيس بوك»: «سبحان الله أنا من ساعة قصة الفيلم دي، وأنا قلت أنا مش هتكلم عن رأيي الشخصي في الفيلم اللي بالمناسبة فيه حاجات معينة فنيا معجبتنيش أوي، وفيه ناس اتكلمت واتناقشت معاهم بكل احترام بعيدا عن نتيجة الحوار، المهم أنا قلت رأيي كده كده مش مهم وعملت شير بس، لرأي أساتذة بيحترمهم الفنانين والجمهور سواء».
وأضاف محمد يسري: «والحقيقة إن في القصة دي كل اللي فارق معايا مدى التطاول، والشتيمة مش إن الناس يعجبها الفيلم أو لأ لأن ده في الآخر حق الجمهور كاملا، قوم إيه بقي يا مؤمن ألاقي الناس نازلة شتايم فيا، وفي أهلي وفي أبويا الله يرحمه، وفي مراتي اللي مش موجودة في الحياة أصلا، وفي عيالي اللي لسه مجوش».
واختتم حديثه: «والكارثة الأكبر إن معظمهم بنات، وستات وفيه عيال أقسم بالله لما دخلت أشوف بروفايلاتهم، ميعدوش الـ 13 سنة وبيشتموا بكل أريحية، ونفسهم نولع في جهنم وحاجات كده لذيذة أوي، فواضح كده يا جماعة فعلا ما شاء الله إن قيمنا المجتمعية عظيمة وفعلا الغلط فينا إحنا.. صباح الفل».
أقرا أيضا - الحالة حرجة جدًا.. نقل جلال الشرقاوي للمستشفى بسبب «كورونا»
