- مساء الخير يا أمينة .
- مش عوايدك ترجع بدرى كده يا سى السيد وكمان بتقولى مساء الخير، لزمن الحكاية فيها إن، مالك يا خويا تكونش عيان ولا حاجة؟
- لا أنا كويس وزى الفل بس عايز أسألك على حاجة كده ع السريع وخارج تاني، ألا فين دهبك يا أمينة، أنا دورت عليه فى المكان إللى بتحطيه فيه ملقتش حاجة خالص، عايزين نلحق نتصرف فيه لحسن شكل الحكومة كده منمرة عليه.عمالين يفتكسولنا ايشى مش عارف دمغة ليزر ايه وفواتير ورسوم والذى منه طبعا!
- يا راجل إيش تاخد الريح من البلاط، لا عاد فيه دهب ولا فضة ولا أى حاجة خلاص.
- ازاى يعنى مش فاهم، طب ممكن تقوليلى فين يا ولية الخلخال اللى جيبتهولك لما جيت اتكلمت عليكي؟
- سلامة عقلك يا سى السيد انت لحقت تنسى يا راجل، ده بعناه من زمان لما كنت مزنوق ومش لاقى فلوس تدخل بيها الواد فهمى الجامعة!
- امممممم طب وجوزين الغوايش اللى جيبتهوملك من الصاغة وشبكتك بيهم راحوا فين؟!
- لا لا لا انت أكيد مش فى وعيك الليلة يا سى السيد، هو انت نسيت لما اتزنقنا فى جوازة البت خديجة وأخدت الغوايش بعتها؟
- طب والسلسلة الكبيرة اللى جبتهالك لما بشرتينى اول مرة انك حامل راحت فين؟
- أهى دى بقى بالذات لزمن تكون فاكرها كويس يا سى السيد لأن دى بعناها علشان تكمل على الفلوس اللى معاك ونبنى دور على الدور اللى احنا فيه لما الشقة ضاقت على الولاد.
- طب وفين الماشاء الله والكردان اللى جبتهوملك من الحج؟
- مالك يا سى السيد هو انت جالك زهايمر مبكر ولا إيه ياخويا؟ أهم دول بقى بعناهم علشان نتصالح مع الحكومة فى الدور اللى بنيناه!
- طب فاكرة الخلخال اللى ندرت وجيبتهولك من الصاغة لما الواد كمال دخل حقوق؟!
طبعا وهو ده ممكن يتنسى، بس انت اخدته بعد كده وبعته عشان نتصالح مع الحكومة تانى وتسجل البيت فى الضرايب العئارية يا سى السيد!
- طب كان فيه شوية خواتم على انسيالات راحوا فين كمان دول؟!
- انت اخدتهم وبعتهم وقولتلى علشان الحكومة حتاخد فلوس على ركنة العربية فى الشارع. حتى بالأمارة ساعتها قولتلك سيب الدهب وبيع العربية والكلام معجبكش وخليتنى اقعد شهرين عند أمى وانت عارف ومتأكد إنها معندهاش واى فاي!
- طب فين الدهب القديم بتاع البت عيشة اللى سابته لما اتجوزت؟!
- يوه يا سى السيد مش كنا كل شهر بنبيع حته عشان ندفع فواتير الغاز والكهربا؟
- يعنى متأكدة مفيش عندنا أى معادن من اللى الحكومة عايزه تعملها دمغة؟
- مفيش غير كام طاسة نحاس على شوية حلل ألمنيوم على شوية شوك ومعالق وسكاكين. أحضرهم يا سى السيد احتياطى لحسن الحكومة بعد ما تخلص حكاية الدهب تعمل حصر للمواعين فى كل مطبخ علشان تدمغها؟!
