دخلت نجلاء سامي أرملة الشهيد عامر عبد المقصود نائب مامور قسم "كرداسة" في نوبة من البكاء في أول تعليق على مشهد إستشهاده في مسلسل "الاختيار 2" قائلة: "زوجى تعرض للتعذيب أربعة ساعات و"لما كان بيحتضر شربته الارهابية مية نار، قبل الي حصل كنت بكلمه واقوله إرجع كان يقول : مش عامر الي يسيب القسم عشان يترفع عليه علم القاعدة مكان علم مصر".
وأضافت "اليوم كان صعب عليا ومن وقتها مابطلتش بكاء لان المشاهد رجعتني لنقطة الصفر من بداية الاحداث التي مر عليها ثمانية سنوات وهي مشاهد مؤلمة أوي " تابعت في مداخلة هاتفية خلال برنامج " كلمة أخيرة " الذي تقدمه الاعلامية لميس الحديدي على شاشة " إكسترا نيوز " خلال شهر رمضان قائلة : "بس المشاهد كانت مهمة عشان الناس تفهم ايه الي حصل لضباط قسم كرداسة ومجنديها ويعرفوا يعني إيه ابطال شرطة وانهم فقط كانوا بيدافعوا عن مكانهم ويعرفوا بطولة عامر عبد المقصود ومأمور القسم رحمة الله عليهم وكل أبطال كرداسة".
واصلت: "كل الي عملوه أنهم كانوا بيدافعوا عن مكانهم عشان لايرفع علم القاعدة وعامر كان مشهود له بالاخلاق السمحة وكل الناس عارفة وأنا كنت منتظراه يرجع وقتها بعد خدمة عشرة سنوات في الفيوم لكن مالحقش لانه إستشهد في مذبحة الخسة والخيانة في كرداسة".
أكملت: "من 8 سنوات ومش بنساه والاحداث في مسلسل الاختيار 2 رجعتني لنقطة الصفر لكن معلش مهمة برضه أن المصريين يفهموا أن شهداء الشرطوا ضحوا كتير اوي عشان مايترفعش علم القاعدة مكان علم مصر وإزاي تصدوا للارهاب الغاشم وزوجى مارضيش يسيب مكانه كان بني أدم خلوق ومحب للخير لكن إرادة ربنا مش هقول غير حسبي الله ونعم الوكيل".
واصلت: |عندي ولدين 27 سنة و21 سنة وكانوا موجودين معايا ومش عارفة احكي حالتنا كانت عاملة إزاي ؟ صحيح اولادي شباب بس الموضوع المنا كثيراً أثناء مشاهدة المسلسل".
ووجهت التحية لابطال الجزء الثاني من مسلسل الاختيار قائلة: "إختيار موفق في الجزء الثاني حتى يلقي الضوء على بطولات الشرطة المصرية كما سلط الجزء الاول الضوء على بطولات رجال الجيش المصري وانا بشكر المنتج والمؤلف والمخرج بيتر ميمي وهقلهم الي إنتوا عرضتوه مايجيش صفر على الشمال من الي حصل على الحقيقة لكن مهم عشان المصريين يعرفوا أن ابطال الشرطة بيضحوا بالغالي والنفيس مش خسارة في مصر".
وعن مشهد تناوله مياه النار في أحداث المسلسل قالت: "ايوه ده كان جوزي الشهيد عامر عبد المقصود كان صايم الستة ايام البيض وده كان اليوم الثاني في الستة ايام وقعدوا يعذبوه 4 ساعات وسحلوه وقطعوا شراينه وضربوه بمواسير مياه على راسه ورصاصه في قدمه حتى يعجز عن المشي ورغم كل ذلك رفض مغادرة المكان وناشدته بمغادرة القسم وقلي : مش عامر عبد المقصود الي يسيب علم القاعدة يترفع على القسم مكان علم مصر".
واصلت في سرد ذكرياتها : "سحلوه من كرداسة لحد ناهيا لحد ماسلموه للمجرمة الحقيرة الي ظهرت في الاحداث سامية الارهابية الي مكنتش تعرفه اصلاً لكن لمجرد الانتقام من وزارة الداخلية وهو بيحتضر كان عاوز يشرب ميه كانت بتشربه مية نار" .
