يناير بمنظور آخر

سارة فهمي
سارة فهمي

زمان قبل 2011 كانت الناس بتنشر صور ابراج ماليزيا ويقولوا شوفوا البلد عاملة ازاي او ينشروا صور التطوير اللي حاصل في جنوب افريقيا ويقولوا شوفوا عاملة ازاي، حتى صور القطارات او المترو في اوروبا او كوريا ،،

كان قلبي بيتعصر من الوجع وانا بشوف الصور دي ،، وفي المقابل اشوف صور عشوائيات مصر في افلام خالد يوسف ،، 

او اشوف صور مفجعة عن انهيار صخرة الدويقة والعيشة الغير ادمية للناس وسكان المقابر والناس اللي بتشرب من مية المجاري ،، وصور المسشفيات الغير ادمية 
ولا لما كنا بنصحى كل يوم على خبر حوادث الطرق المتهالكة ،، 
و كنت بتحسر على حالنا لما اشوف حد متصور جمب ناطحة سحاب في اي بلد اجنبي 
 او اشوف صور مسؤل شاب في اي دولة راكب عجلة او بيمشي وسط الناس يتكلم معاهم 
واحنا رئيسنا قاعد في شرم الشيخ محدش يعرف عنه حاجة ولا هو يعرف عننا حاجة 

دلوقتي مبقتش بشوف الا صور اعمال ومشروعات وتوسع عمراني وزراعي وصناعي ، وبقيت اشوف صور العاصمة الجديدة  والمدن الجديدة ونطاحات السحاب في العلمين ،، وفي كل مدينة تطوير واعمار 

حتى صور العشوائيات بقيت بشوفها وهي بتتهد بس ،، وبشوف الناس وهي بتستلم شقق جميلة ومفروشة في ابراج راقية ومحترمة 
صور الطرق والكباري والانفاق اللي على اعلى مستوى.. صورمستشفيات بتتبني ومستشفيات بتتطور وتتجدد 

و بقيت بشوف اخوة عراقيين ناشرين صور محطات الكهربة وبيقولو شوفوا مصر بتعمل ايه
بقيت اشوف الاخوة التوانسة وهما بيتكلموا بكل فخر وحب عن بلدي ورئيسها وعن المشروعات اللي بتتنفذ على قدم وساق في مصر 

بقيت اشوف اخوة لبنانيين بينشروا صور مشروعات مصر ويقولو السيسي يصنع معجزات ،، او اللاقي حد بيقولي سلفونا السيسي سنتين 😊

بقيت اشوف اجانب بيتكلموا عن مصر كلام يفرح 

وبقيت بشوف رئيس بلدي راكب عجلة وبيلعب رياضة ،،وبيقابل الناس ،ويتكلم معاهم 

هما خططوا في يناير 2011  لاستغلال قهرنا وحزننا على بلدنا وقالو ثورة اصلاح  زادوها خراب وتدمير  ،، وفي الاخر سقطوا كلهم ،،
 وربنا قدر لها رئيس يبنيها ويحميها ،، حقيقي فخورة بيك وفخورة بنفسي لاني انتخبتك 

لو يناير بكل مساؤها ،، وصلتنا في الاخر للسيسي ،،  

فده بيفكرني بالاية القرانية اللي بتقول 
ويمكرون ويمكر الله ،، والله خير الماكرين 
#ذكرى_25يناير