رامي صبري يكشف حقيقة دفاعه عن «المهرجانات»: «مبحبهاش.. وضد منعها»

رامي صبري
رامي صبري

كشف المطرب رامي صبري حقيقة دفاعه عن أغاني المهرجانات، بنشر رسالة توضيح عبر صفحته بموقع التواصل الاجتماعي "فيسبوك"، وذلك بعد رفضه لفكرة منعهم من الغناء.

 

وكتب رامي صبري: "توضيح مهم.. أنا راجل خريج المعهد العالي للموسيقى العربية قسم تأليف موسيقي وكنت في فرقة أم كلثوم وكنت من أهم طلاب المعهد.. صعب أوي أكون بعد كله ده أبقى بدافع عن أغاني المهرجان.. بالعكس اللي متابعني كويس عارف إني نزلت بوست من شهر تقريبا وقولت فيه (مينفعش أغاني المهرجان تبقي ترند مصر)".

 

وتابع: "ليه قولت كده؟.. عشان أغاني المهرجان فيها مشكلتين.. الأولى الكلام.. فيه مشاكل كبيرة وكبيرة جدا.. ثانيا المغني اللي بيغني المهرجان غير مؤهل أنه يغني من الأساس (ومش كلهم) في طبعا منهم ناس بتغني حلو جدا وهذا الغناء يندرج تحت كلمة (غناء شعبي) وليس مهرجان.. ثالثا وهو الأهم بانهم بياخدو ألحان ملحنين كبار في أغانيهم وأغلبيتهم بيعملو كده وبينسبوها لنفسهم وده أكيد مش من حقهم وغلط.. ولكن أنا ضد أننا نعالج مشكلة بمشكلة أكبر وهو الإلغاء.. إلغاء المهرجان مش هو الحل لأنهم هيغنو بردو بس على يوتيوب وعلى الابلكيشنز.. وخارج مصر.. فكان رأيي أننا نحلها بأننا نجيب الشباب دي ونوعيهم لأنهم أخواتنا مش أعدائنا وهما عايزين حد يفهم مش يلغيهم.. هو ده كان قصدي بالظبط".

 

واختتم رامي صبري كلام: "للمرة الأخيرة ومش هتكلم في الموضوع ده تاني.. المهرجان مش ذوقي ومبحبهوش خااالص ولكن ده مش معناه اني الغيه!.. وشكرا".

 

وطالب رامي صبري، أمس، نقيب الموسيقيين، بالجلوس مع مطربي المهرجانات، ووضع أسس على طريقة للأغاني التي يقدمونها في الفترة المقبلة، وامضاء تعهد على أنفسهم بأن يسيروا عليها، حفاظا على رزقهم والجمهور الذي يتابعهم.

 

ووجه رامي صبري رسالة للنقيب عبر «فيسبوك» قائلا: «استاذ هاني شاكر الفنان الكبير القدوة ونقيبنا الغالي.. معلش حاول تقعد مع كل شباب المهرجانات دي في اجتماع كبير وتحطلهم قواعد في طريقة كلام الأغاني يمشو عليها وتبقي مكتوبة ومضيين عليها والإعلام كلو يبقي شاهد عليها.. بس بلاش تمنعهم عشان رزقهم وأهلهم وكمان عشان في جمهور كبير متابعهم.. وانا عارف أنك إنسان طيب وفنان كبير وقدوة لينا كلنا طبعا وعايز تحافظ على الفن في مصر وأحنا كلنا عايزين كده.. بس بلاش تقطعلهم رزقهم وحيات الغالية.. ربنا يكرمك دايما على فعل الخير يا حبيبي».

 

وكانت نقابة المهن الموسيقية برئاسة هاني شاكر، اتخذت إجراءا حاسما ضد مطربي المهرجانات، بعد حالة الجدل التي أُثيرت بعد حفل حسن شاكوش وعمر كمال باستاد القاهرة، بمنعهم عن الغناء ووقفهم عن إحياء حفلات.

 



 
 
 

 

ترشيحاتنا