أول حوار مع أم هشام فى 2020

منذ أن رحلت أمى عن دنيانا رأيتها كثيرا فى المنام وفى كل مرة تدور بيننا حوارات كثيرة ترفض أن أنشر منها حرفا واحدا ولكنى فوجئت بها توافق على نشر هذا الحوار كاملا:
- عامل إيه يا هشومة وحشتنى يا واد ووحشونى مراتك وبناتك.
- بخير يامه الحمد لله والله انتى إللى واحشانى قوى طمنينى عليكى وعلى الحاج احمد.
- بخير يا ولدى احنا متهنيين هنا ومش قلقانين غير عليكم.
- ماتقلقيش يامه احنا بخير والحمد لله.
- نبرة صوتك ماتقولش كده.. عيل بطنى يعرف رطنى هو أنا حاتوه عنك وعن صوتك يا ولدى؟
- لا يامه العادى يعنى مانتى عارفة ظروف الحياة.
- مانت غلطان.. مليون مرة اقولك شوفلك عقد فى أى حتة أنا مش عارفة قاعد عندك بتعمل إيه؟!
- عقد فين بس يامه؟
- روح ليبيا مثلا يا ولدى اعملك قرشين عشان تعرف تجوز البنات!
- هههههههههه الله يحظك يامه ليبيا دلوقتى مولعة واحتمال كبير يكون فيها حرب قريب ربنا يسترها على الغلابة إللى فى ليبيا يامه.
- ليه يا ولدى هو البترول نشف فى ليبيا؟
- لا يامه مانشفش ولا حاجة والطمع فى البترول ده هو سبب كل المشاكل.
- بلاها ليبيا روح العراق أظن العراقيين بيحبوا المصريين وكمان البترول هناك لسه بخيره.
- الأمريكان بيشفطوه أول بأول يامه والغلابة إللى فى العراق بيدفعوا تمن صراعات ملهومش ذنب فيها.. ادعى للغلابة إللى فى العراق يامه ربنا يخلصهم من الامريكان ومن كل الطمعانين فيهم.
- طب ماتروح أمريكا يا ولدى تشتغل هناك طالما هى إللى بتشفط كل بترول العرب!
- ترامب يامه لو يطول مش عايز جنس عربى واحد يروح أمريكا والود وده يطلع قرار رسمى بترحيل كل العرب إللى هناك أصلا وكمان هو مشغول بيحارب ايران فى العراق.
- قصدك بيحارب ايران فى طهران.
- لا يامه فى العراق مش فى طهران دى أصلها حكاية طويلة نبقى نحكيها فى حلم تانى المهم ادعى للعرب الغلابة إللى فى أمريكا يامه.
- خلاص يا سيدى بلاها ليبيا وبلاها العراق إيه رأيك تروح الشام.. روح وادعيلى سوريا جميلة وحتلاقى فيها فرص شغل حلوة تعملك قرشين.
- ههههههههه ملقتيش غير سوريا يامه؟ ده اخواتنا السوريين هنا ماليين البلد مطاعم.. بصراحة عليهم شاورمة تستاهل بقك والغلابة إللى لسه هناك شايفين المر ألوان.. ادعى للغلابة إللى فى سوريا يامه.
- طب خلاص عليك وعلى جبل لبنان، أى نعم طول عمرى أخاف عليك من بنات لبنان لكن انت كبرت خلاص وأظنك معدتش طايش وتعرف مصلحتك.. روح اشتغل فى لبنان بس سنتين تلاتة ولا حاجة هاتلك قرشين للبنات.
- هههههههههه الظاهر انك مش متابعة إللى بيحصل فى الدنيا يامه.. لبنان انضربت عين والمظاهرات مش مبطلة ولغاية دلوقتى مش عارفين يشكلوا وزارة. ادعى للغلابة إللى فى لبنان يامه.
- ده إيه الإحباط اللى العالم فيه ده يا ولدى.
- سيبك من العالم وطمنينى على ابويا.
- يوه فكرتنى أنا لازم أمشى لحسن اتأخرت عليه قوى.
- سلميلى عليه يامه.
- مش عايز حاجة يا ولدى؟
- أيوه يامه عايزك تدعى للغلابة المستضعفين فى دول تانية.. خدى عندك مثلا..
- حيلك حيلك هو انا مخى دفتر؟ خدها من قصيرها يا ولدى والحلم الجاى هاتلى خريطة للعالم أحطها قدامى وانا بادعى للمستضعفين فى كل مكان خوفا من الخطأ أو النسيان!