شد وجذب

اللى يزعل يتفلق

وليد عبدالعزيز
وليد عبدالعزيز

كلمتين فيهم الخلاصة.. ممكن نطبقهم على أى حد فى حياتنا.. الناس تزعل من بعض لما مثلا انا أكون بعمل الصح وانت بتعمل الغلط أو العكس وبعدين الغلطان يزعل.. طب ما تتفلق صحيح.. لما رئيس الجمهورية يقول إن البلد هتفضل تبنى وتعمر وتعمل مشاريع جديدة واللى يزعل يتفلق يبقى الراجل عنده حق.. خلينا نتابع الموقف كده بكل تجرد.. تكتشف ان احنا بقالنا سنين كتير كل أسبوع بنشوف مشروعات جديدة وحاجات ولا فى الأحلام.. الراجل يطلع يقول المشروع ده هيخلص فى سنة وبعد سنة نلاقى الصحراء تحولت إلى جنة فى الأرض وبعدها نسمع قلة أدب وتريقة وكلام فارغ رغم ان كل مشروع اتعمل فى مصر من أول قناة السويس لحد شبكة الطرق والمساكن البديلة للعشوائيات ودت البلد فى حتة تانية خالص.. ومع ذلك تلاقى الناس الفشلة قاعدين للتقطيع وبس.. طب اتفلقوا بجد.. تكتشف ان فريق أعداء النجاح متواجد فى كل مكان.. ودايما عينه سودة.. ما يشوفش الحاجة الحلوة أبدا.. ولو شافها يشوفها وحشة وملهاش لزمة دلوقتى.. عارفين الناس ما بتحبش الناجح ليه.. علشان هما فشلة واتعودوا يطلعوا على كتاف غيرهم.. بمناسبة المشروعات اللى اتعملت وبتتعمل فى مصر تعالوا كده نفكر مع بعض شوية ونشوف الناس السودة مش عاجبها إيه.. مثلا شبكة الطرق العملاقة اللى كلنا بنمشى عليها ونقول احنا بقينا فى أوربا وعندنا شوية طرق بنكتشفها بالصدفة.. الناس تدور على مطب مثلا فى ٥ آلاف كيلو طرق وتقولك اتفرج ياعم.. دى الطرق اللى اتصرف عليها مليارات.. يمسك فى ٢ متر ويسيب ٥ آلاف كيلو.. دى العين السودة بجد واللى لازم صحابها يتفلقوا.. لو ركزنا هنلاقى الدولة بتسابق الزمن فى كل ثانية.. بتطور الطرق والمستشفيات والسكة الحديد والمطارات والموانى وبنزرع أراضى جديدة وبنعمل محطات تحلية مياه وكهرباء وصرف صحى.. وبنحارب إرهاب اسود وبنواجه حرب شائعات.. وبندافع عن حقنا فى مياه النيل.. وكمان بنحارب الأمراض وبندور على فرص تشغيل للناس.. اللى عاوز يشوف الحلو هيلاقى كتير اوى.. بس اللى عينه سودة عمره ما هيشوف غير السواد اللى أصلا مالى القلوب قبل العيون.. الصراحة ان الإعلام عليه دور كبير لأنه الوحيد القادر على توصيل الصورة الكاملة للناس.. بس كمان محتاجين ان الناس اللى عندها المعلومات الكاملة عن المشروعات والإنجازات توفرها للإعلام علشان نقدر نحكى الحكاية من أولها بالمعلومات الصحيحة.. البلد محتاج كل المخلصين لاننا نجحنا بجد وحققنا حاجات كتير.. سيبك من المنظرتية وبتوع حكاوى القهاوى.. عاوزين أفكار جديدة تقدر تنقل للناس الحقيقة بكل صراحة.. وناس ما يتقلش عليهم مطبلتية.. لأن اللى اتعمل فى مصر أكبر بكتير من اللى بيتقال.. كل مشروع اتعمل ليه حكاية وقصة نجاح.. ممكن الناس المسئولة تفكر مع بعض وتلاقى طريقة جديدة تحكى بيها حكاية دولة كانت أشلاء وبقت دولة متماسكة وبتكبر كل يوم بفضل ولادها المخلصين.. اللى قلبه اسود هيفضل اسود لأنه والعياذ بالله مريض ومش هيتعالج.. إنما اللى بيحب البلد بيشوف الإنجازات وبيفرح ويفتخر ان مصر بقى فيها عاصمة جديدة وفيها مدن جديدة.. ومبقاش فيها بيوت من الصفيح.. الناس اللى مش شايفة تتفلق بجد.. وكمان تخبط راسها فى اقرب مطب صناعى.. وتحيا مصر.

 

 

 

 
 

احمد جلال

محمد البهنساوي